في الربع الاخير من السنه بتبدأ الشركات في إعداد موازنة العام القادم وعندنا أكثر من طريقة تتبعها الشركات في عملية التخطيط لأهداف السنة القادمة
Top Down Approach (Imposed)
في الطريقة دي الإدارة العليا هي إل بتحط الموازنة وبتبلغ بيها الناس ال تحت ولكن الطريقة دي غير مناسبة للشركات الكبيرة والشركات اللي بيئتها ديناميكية متغيره، لكنها تنفع اكتر في الشركات الصغيرة.
من مميزات هذه الطريقة :
-التوافق والانسجام مع الأهداف الاستراتيجية للشركة لأن الإدارة العليا هم واضعي الخطط الاستراتيجية
-مبناخدش وقت طويل في عملية إعداد الموازنة لأن مبيكونش في نقاشات ومداولات مع الأقسام والإدارات الدنيا
-تحسين عملية إتخاذ القرار والرقابة
-منع تحيز وتلاعب الموظفين من خلال عدم اشراكهم في عملية التخطيط
وبالرغم من هذه المميزات لكن الطريقة دي عيوبها كتيرة جدا
-انعدام التواصل بين الإدارة العليا والإدارات الدنيا نتيجة عدم إشراك الناس اللي تحت في العمليات في إعداد الموازنة علي الرغم من أنهم اكتر ناس على دراية بالامور بحكم قربهم من العمليات التشغيلية
-نقص التحفيز وزيادة مقاومة الموظفين نتيجة تجاهلهم وعدم اشراكهم
-نقص الالتزام والقبول بالأهداف الموضوعة لأن الإدارات اللي تحت شايفه إن الأهداف دي غير واقعيه وتم إملائها وفرضها عليهم من الإدارة العليا
Paricipative Approach (Bottom up)
في الطريقة دي بيتم إشراك جميع الإدارات التشغيلية وبيكون في نقاشات ومداولات مع الإدارة العليا والطريقة دي مناسبة جدا للشركات الكبيرة والشركات التي تمتلك مديرين في الإدارات الدنيا أكفاء ولديهم مهارات تخطيط
ومن مميزات هذه الطريقة :
-زيادة التحفيز لدي الموظفين لأنهم هما المخططين للموازنة وبالتالي بيكون في احساس بالانتماء وأنهم جزء من الشركة
-قبول والتزام الموظفين بالخطة وعدم المقاومة
-الخطة بتكون واقعية اكتر وقابلة للتحقق
ولكن الطريقة دي فيها بعض العيوب ايضا
-بنستهلك وقت كبير جدا نتيجة النقاشات والمداولات
– إمكانية حدوث تلاعب من المديرين عن طريق وضع أهداف سهلة التحقق علشان يتم تحقيقها ويطلع معاه انحراف مرغوب فيه وياخد المكافأة.
مثال بسيط علي ذلك مدير قسم الإنتاج يبالغ ويقول ان تكاليفه المتوقعة في العام القادم ١٠٠٠٠ علي الرغم من أنها أقل من كده وليكن ٨٠٠٠ ويجي في الفعلي يصرف ٩٠٠٠ وبالتالي يحقق انحراف مرغوب فيه مقداره ١٠٠٠
والعملية دي بنسميها
Budgetery Slack
المبالغة في التكاليف وتقليل الإيرادات عند وضع الموازنة
ملحوظة المثال اللي فوق للتبسيط فقط المفروض تحليل الانحرافات بيكون وفقا للموازنة المرنه علشان أحيد تأثير التغير في حجم النشاط
