من أشهر المقاييس المستخدمة في عملية تقييم الأداء هى العائد على الاستثمار 
هنتكلم عن العائد على الاستثمار بشكل متخصص أكتر عند استخدامه لتقييم أداء مديري مركز الاستثمار وكنا عملنا بوست منفصل قبل كده وضحنا فيه ايه هو مركز الاستثمار تحت عنوان محاسبة المسئولية 
بحسب العائد على الاستثمار من خلال قسمة الربح ال تحت صلاحيات المدير على متوسط إجمالي الأصول  
ولكن هنا حصل مشكلة إن عندنا تعريفات مختلفة للبسط والمقام ود طبعا هياثر علي فكرة المقارنة 

البسط في في شركات ممكن تستخدم
١)الربح قبل الضرائب
٢)وفي شركات تانية تعرفه علي إنه صافي الربح

وكذلك المقام  في شركات ممكن تعرفه على إنه
١)متوسط إجمالي الأصول
٢)متوسط إجمالي الأصول العاملة
من خلال انها تستبعد الأصول العاطلة زي مثلا لو شاري حتة أرض وركنها علشان أبيعها لما سعرها يزيد أو إن الإدارة العليا شاريها علشان هتعمل بيها توسع في المستقبل وبالتالي هذه الأصول تكون خارج نطاق سيطرة المدير لأن هو ملوش صلاحيات عليها

٣)إجمالي الأصول العاملة مطروح منها الالتزامات المتداولة بحجة أن الالتزامات المتداولة تعتبر من البنود التي تقع تحت تحكم مدير مركز الاستثمار
٤)إجمالي حقوق حاملي الأسهم

ومن ضمن عيوب المقام ده إن بيحاسب المدير على قرارات التمويل بالدين طويل الأجل الي هي اصلا الإدارة العليا المتحكمة فيها 
.
.
من ضمن عيوب إستخدام العائد على الاستثمار في عملية تقييم أداء مديري مراكز الاستثمار التالي : 
١)ممكن المديرين يتلاعبوا في الدخل (البسط) من خلال تأجيل بعض المصاريف زي مصروفات الصيانة وبالتالي يزيد الدخل ويحسن العائد على الاستثمار أو من خلال التلاعب وتغيير في الطرق والسياسات المحاسبية المتبعة 
٢)من أخطر عيوبه هو اني بيخلي تركيز المديرين على الأجل القصير علشان يحقق المستهدف وده بيكون له آثار سلبيه على الاجل الطويل زي مثلا إن المدير يقلل من مصروفات البحث والتطوير 
٣)يضيع على الشركة استثمارات مربحة وتضيف قيمة للشركة من خلال إن المدير بيرفض مقترحات استثمارية بالرغم من أن العائد أكبر من تكلفة رأس المال ولكنه بيرفضها لأن العائد بتاعها أقل من العائد على الاستثمار بتاعه وبالتالي هتقولو العائد على الاستثمار وده ال هيتقيم على أساسه وبالتالي هياثر علي البونص بتاعه ولذلك عند تقييم الأداء لابد أن يكون التقييم علي اكثر من جانب ليس الجانب المالي فقط واستخدم عدة مقاييس مختلفة ومن هنا جت فكرة بطاقات الأداء المتوازن 

وده هيكون موضوعنا في البوست القادم